شانِ مصطفی ﷺ

اپنی بات  

السّلام علیکم ! 

جیسا کہ آپ جانتے ہیں، یہ شمارہ شانِ مصطفیؐ نمبر ہے۔ میرے لیے نبی  ﷺ کی شان بیان کرنا چھوٹا منہ اور بڑی بات کے مِصداق ہے۔ حضور نبی کریم   ﷺ کی ذات بابرکات عالی صفات تمام اخلاق و فضائل اور صفات ِجمال میں اعلیٰ و اشرف ہے۔ میرے نزدیک ان تمام کمالات و محاسن کا احاطہ کرنا اور بیان کرنا انسانی قدرت و طاقت سے باہر ہے کیوںکہ وہ تمام کمالات، جن کا عالم امکان میں تصور ممکن ہے، سب کے سب نبی کریم   ﷺ کو حاصل ہیں۔ اللہ تعالیٰ نے اخلاق و عادات کی تمام خوبیاں، کمالات اور اعلیٰ صفات حضور اقدس  ﷺ کی ذات گرامی میں جمع فرما دی تھیں۔ آپ کو اللہ تعالیٰ نے اوّلین و آخرین کے علوم سے، جو آپ  ﷺ کے شایانِ شان تھے، بہرہ ور فرمایا تھا حالاں کہ آپ  ﷺ اُمّی تھے یعنی کچھ لکھ پڑھ نہ سکتے تھے نہ انسانوں میں سے کوئی آپ  ﷺ کا معلم تھا۔ اس کے باوجود آپ  ﷺ کو ایسے علوم عطا فرمائے گئے تھے جو تمام کائنات میں کسی اور کو نہیں دیے گئے۔ آپ  ﷺ کو کائنات ارضی کے تمام خزانوں کی کنجیاں پیش کی گئیں مگر آپ   ﷺنے دُنیوی مال و متاع کی بجائے آخرت کو ترجیح دی۔

حضرت انسؓ فرماتے ہیں کہ نبی اکرم  ﷺ علم و حکمت کے سب سے زیادہ جاننے والے تھے۔ سب سے زیادہ محترم، سب سے زیادہ منصف، سب سے زیادہ حلیم و بردبار، پاک دامن، لوگوں کو سب سے زیادہ نفع پہنچانے والے اور لوگوں کی ایذا رسانی پرسب سے زیادہ صبر و تحمل کرنے والے تھے۔ (وسائل الوصل الی شمائل الرسولؐ)

بخاری و مسلم میں سیّدنا انسؓ ہی سے روایت ہے کہ نبی کریم   ﷺ تمام لوگوں میں سب سے زیادہ حسین، بہادر اور فیاض تھے۔ اس کی و جہ یہ ہے کہ آپ  ﷺ تمام انسانوں میں سب سے اشرف تھے۔ آپ  ﷺ کے مزاج میں سب سے زیادہ اعتدال تھا۔ جس میں یہ اوصاف ہوں، اس کا ہر فعل بہترین افعال کا نمونہ ہو گا۔ وہ تمام لوگوں میں حسین ترین صورت والا اور اعلیٰ ترین اخلاق کا حامل ہوگا۔

حقیقت یہ ہے کہ کسی کا فہم، کسی کی عقل اور کسی کا قیاس۔۔۔۔۔۔  حضور   ﷺ کے مقام کی حقیقت اور عظمت تک نہیں پہنچ سکتا۔ سبحان اللہ !

آب و گِل میں مدتوں آرائشیں ہوتی رہیں

تب کہیں اک آدمی کونین کا حاصل بنا 

(امِ معبد)

آپ کی خوشیوں اور کامیابیوں کے لیے دعا گو 

  باجی حمیرا اطہر